LTF Art. 70 - Autras decisiuns

Einleitung zur Rechtsnorm LTF:

Art. 70 Autras decisiuns

¹ Decisiuns dal Tribunal federal che n’obligheschan betg da pajar ina summa da daners u da prestar ina garanzia en furma da daners ston vegnir exequidas dals chantuns da medema moda e maniera sco las sentenzias legalmain valaivlas da lur dretgiras.

² Percunter ston ellas vegnir exequidas tenor las suandantas disposiziuns:

a. tenor ils artitgels 41–43 da la Lescha federala dals 20 da december 1968 ⁽¹⁾ davart la procedura administrativa: sch’il Tribunal federal ha decidì en ina chaussa che tutga en emprima instanza al champ da cumpetenza d’ina autoritad administrativa federala;

b. tenor ils artitgels 74–78 PC ⁽²⁾ : sch’il Tribunal federal ha decidì sin fundament d’in plant;

c. tenor ils artitgels 74 e 75 da la Lescha dals 19 da mars 2010 ⁽³⁾ davart l’organisaziun da las autoritads penalas: sch’il Tribunal federal ha decidì en ina chaussa penala che suttastat a la giurisdicziun federala. ⁽⁴⁾

³ … ⁽⁵⁾

⁴ Cunter in’execuziun manglusa poi vegnir fatg recurs tar il Cussegl federal. Quel prenda las mesiras necessarias.

⁽¹⁾ SR 172.021
⁽²⁾ SR 273
⁽³⁾ SR 173.71
⁽⁴⁾ Versiun tenor la cifra II 5 da l’agiunta da la LF dals 19 da mars 2010 davart l’organisaziun da las autoritads penalas, en vigur dapi il 1. da schan. 2011 (AS 2010 3267; BBl 2008 8125).
⁽⁵⁾ Abolì tras la cifra II 5 da l’agiunta da la LF dals 19 da mars 2010 davart l’organisaziun da las autoritads penalas, cun effect dapi il 1. da schan. 2011 (AS 2010 3267; BBl 2008 8125).

Es besteht kein Anspruch auf Aktualität und Vollständigkeit/Richtigkeit.

Wollen Sie werbefrei und mehr Einträge sehen? Hier geht es zur Registrierung.