LPP Art. 47a - Sortida da l’assicuranza obligatorica suenter la cumplenida dal 58. onn da vegliadetgna

Einleitung zur Rechtsnorm LPP:

Art. 47a ⁽¹⁾ Sortida da l’assicuranza obligatorica suenter la cumplenida dal 58. onn da vegliadetgna

¹ Ina persuna assicurada che sorta da l’assicuranza obligatorica suenter la cumplenida dal 58. onn da vegliadetgna, perquai che la relaziun da lavur è vegnida schliada dal patrun, po cuntinuar l’assicuranza tenor l’artitgel 47 u pretender che quella vegnia cuntinuada tenor ils alineas 2–7 en la dimensiun vertenta tar sia veglia instituziun da provediment.

² La persuna assicurada ha la pussaivladad d’augmentar il provediment da vegliadetgna tras contribuziuns durant la cuntinuaziun da questa relaziun d’assicuranza. La prestaziun da sortida resta en l’instituziun da provediment, er sche il provediment da vegliadetgna na vegn betg augmentada vinavant. Sche la persuna assicurada entra en ina nova instituziun da provediment, sto la veglia instituziun da provediment pajar a la nova instituziun la prestaziun da sortida en la dimensiun che po vegnir duvrada per acquistar las prestaziuns reglamentaras cumplainas.

³ La persuna assicurada paja contribuziuns per cuvrir las ristgas mort ed invaliditad ed ils custs d’administraziun. Sch’ella augmenta vinavant il provediment da vegliadetgna, paja ella supplementarmain las contribuziuns correspundentas.

⁴ L’assicuranza finescha, sche la ristga mort u invaliditad capita u cur che la vegliadetgna ordinaria reglamentara da renta è cuntanschida. En cas d’ina entrada en ina nova instituziun da provediment finescha ella, sch’i vegnan duvrads en la nova instituziun dapli che dus terzs da la prestaziun da sortida per acquistar las prestaziuns reglamentaras cumplainas. L’assicuranza po vegnir disditga da la persuna assicurada da tut temp e da l’instituziun da provediment, sch’i èn avant maun contribuziuns che n’èn anc betg vegnidas pajadas.

⁵ Persunas assicuradas che cuntinueschan lur assicuranza tenor quest artitgel han ils medems dretgs sco las persunas ch’èn assicuradas en il medem collectiv sin basa d’ina relaziun da lavur existenta, en spezial en quai che reguarda ils tschains, la tariffa da conversiun sco er ils pajaments supplementars da l’anteriur patrun u da terzas persunas.

⁶ Sche la cuntinuaziun da l’assicuranza ha dur dapli che 2 onns, ston las prestaziuns d’assicuranza vegnir retratgas en furma d’ina renta; la prestaziun da sortida na po betg pli vegnir retratga anticipadamain u impegnada per acquistar proprietad d’abitar per l’agen basegn. Resalvadas restan disposiziuns reglamentaras che prevesan il pajament da las prestaziuns mo en furma da chapital.

⁷ L’instituziun da provediment po prevair en il reglament che l’assicuranza tenor quest artitgel possia vegnir cuntinuada gia a partir dal 55. onn da vegliadetgna cumplenì. Ella po prevair en il reglament che la persuna assicurada po pretender ch’i vegnia assicur in salari pli pitschen che quel da fin ussa, e quai per tut il provediment u mo per il provediment da vegliadetgna.