Lescha federala davart la prevenziun professiunala per vegls, survivents ed invaliditad (LPP)

Art. 66 Repartiziun da las contribuziuns

¹ L’instituziun da prevenziun fixescha en las disposiziuns reglamentaricas l’autezza da las contribuziuns dal patrun e dals lavurants. La contribuziun dal patrun sto esser almain uschè gronda sco las contribuziuns totalas da tut ses lavurants. In import pli grond dal patrun po vegnir fixà mo cun ses consentiment.

² Il patrun debitescha a l’instituziun da prevenziun tut las contribuziuns. Per contribuziuns che na vegnan betg pajadas ad ura po l’instituziun da prevenziun pretender tschains da retard.

³ Il patrun deducescha dal salari la part da la contribuziun dal lavurant ch’è fixada en las disposiziuns reglamentaricas da l’instituziun da prevenziun.

⁴ El assegna sias atgnas contribuziuns e las contribuziuns dals lavurants a l’instituziun da prevenziun fin il pli tard a la fin da l’emprim mais suenter l’onn chalendar u suenter l’onn d’assicuranza, per il qual vegnan debitadas las contribuziuns.¹

¹ Integrà tras la cifra I da la LF dals 3 d’oct. 2003 (1. revisiun da la LPP), en vigur dapi il 1. da schan. 2005 (AS 2004 1677; BBl 2000 2637).