Lescha federala davart las persunas estras e l’integraziun (LEI)

Art. 30

¹ Da las premissas d’admissiun (art. 18-29) po vegnir divergià per:

a.

reglar l’activitad da gudogn da las persunas estras ch’èn vegnidas admessas en il rom da la reuniun da la famiglia, sch’i n’exista nagin dretg da pratitgar in’activitad da gudogn (art. 46);

b.

tegnair quint da cas da direzza persunals gravants u d’interess publics impurtants;

c.

reglar la dimora d’uffants confidads;

d.

proteger persunas cunter explotaziun, sche quellas persunas èn periclitadas spezialmain en connex cun lur activitad da gudogn;

e.¹

reglar la dimora da victimas e da perditgas dal commerzi cun umans sco er da persunas che collavureschan cun las autoritads da persecuziun penala en il rom d’in program per la protecziun da perditgas da la Svizra u da l’exteriur u d’in Tribunal penal internaziunal;

f.

pussibilitar dimoras en il rom da projects d’agid e da svilup per la collavuraziun economica e tecnica;

g.

facilitar il barat economic, scientific e cultural internaziunal sco er la scolaziun professiunala e la furmaziun supplementara professiunala;

h.

simplifitgar - per motivs dal manaschi - il transfer da persunas che appartegnan al cader superiur e da spezialists indispensabels en interpresas ch’èn activas sin plaun internaziunal;

i.²

...

j.

pussibilitar ina dimora da furmaziun supplementara en Svizra ad emploiads au pair che vegnan intermediads d’ina organisaziun renconuschida;

k.

facilitar la readmissiun da persunas estras che possedevan ina permissiun da dimora u da domicil;

l.

reglar l’activitad da gudogn sco er la participaziun a programs d’occupaziun da requirents d’asil (art. 43 da la Lescha d’asil dals 26 da zercladur 1998³, LAsil), da persunas admessas provisoricamain (art. 85) e da persunas che basegnan protecziun (art. 75 LAsil).

² Il Cussegl federal fixescha las cundiziuns generalas e regla la procedura.

¹ Versiun tenor la cifra 1 da l’agiunta da la LF dals 23 da dec. 2011 davart la protecziun da perditgas ordaifer las proceduras, en vigur dapi il 1. da schan. 2013 (AS 2012 6715; BBl 2011 1).
² Abolì tras la cifra I da la LF dals 18 da zer. 2010 (admissiun facilitada da persunas estras che han in diplom svizzer da scola auta), cun effect dapi il 1. da schan. 2011 (AS 2010 5957; BBl 2010 427 445).
³ SR 142.31