Cudesch da procedura penala (CPP)

Art. 261

¹ Documents dal servetsch d’identificaziun davart la persuna inculpada dastgan vegnir conservads ordaifer il dossier d’actas durant la suandanta perioda e dastgan er vegnir duvrads, sch’igl exista in suspect suffizient ch’ina persuna commettia in nov delict:

a.

en cas d’ina condemnaziun u d’in acquittament pervia dad irresponsabladad penala: fin a la scadenza dal termin per stritgar las registraziuns en il register penal;

b.

en cas d’in acquittament per auters motivs, en cas d’ina sistida u d’ina decisiun da betg avrir ina procedura: fin a l’entrada en vigur da la decisiun.

² Sch’ins sto - en in cas da l’alinea 1 litera b - far quint sin basa da tscherts fatgs ch’ils documents dal servetsch d’identificaziun davart la persuna inculpada pudessan servir a sclerir acts chastiabels futurs, dastgan els - cun il consentiment da la direcziun da la procedura - vegnir conservads e duvrads durant maximalmain 10 onns dapi che la decisiun è entrada en vigur.

³ Documents dal servetsch d’identificaziun davart persunas betg inculpadas ston vegnir destruids, uschespert che la procedura cunter la persuna inculpada è terminada u sistida ubain uschespert ch’igl è vegnì decidì da betg avrir la procedura.

⁴ Sche l’interess da conservar u da duvrar ils documents dal servetsch d’identificaziun n’è evidentamain betg pli avant maun avant la scadenza dals termins tenor ils alineas 1-3, ston els vegnir destruids.