Constituziun federala da la Confederaziun svizra (BV)

Art. 197

1. Adesiun da la Svizra a l’ONU

¹ La Svizra aderescha a l’Organisaziun da las Naziuns Unidas.

² Il Cussegl federal vegn autorisà da drizzar al secretari general da l’Organisaziun da las Naziuns Unidas (ONU) ina dumonda da la Svizra da vegnir recepida en questa organisaziun ed in’explicaziun davart l’adempliment da las obligaziuns cuntegnidas en la Charta da las Naziuns Unidas¹⁵⁷.

2.¹⁵⁸ Disposiziun transitorica tar l’art. 62 (Fatgs da scola)

A partir da l’entrada en vigur dal conclus federal dals 3 d’october 2003¹⁵⁹ davart la refurma da la gulivaziun da finanzas e da la repartiziun da las incumbensas tranter la Confederaziun ed ils chantuns surpiglian ils chantuns las prestaziuns da fin uss da l’assicuranza d’invalids vi da la scolaziun speziala (inclusiv l’educaziun prescolara pedagogic-curativa tenor l’artitgel 19 da la Lescha federala dals 19 da zercladur 1959¹⁶⁰ davart l’assicuranza d’invalids), fin ch’els disponan da concepts da scola­ziun spe­ziala ch’èn approvads dal chantun, almain dentant durant trais onns.

3.¹⁶¹ Disposiziun transitorica tar l’art. 83 (Vias naziunalas)

Ils chantuns construeschan las vias naziunalas ch’èn enumeradas en il conclus fede­ral dals 21 da zercladur 1960¹⁶² davart la rait da las vias naziunalas (stadi tar l’entrada en vigur dal conclus federal dals 3 d’october 2003¹⁶³ davart la refurma da la gulivaziun da finanzas e da la repartiziun da las incumbensas tranter la Confederaziun ed ils chantuns) tenor las prescripziuns e sut la surveglianza suprema da la Confederaziun. La Confederaziun ed ils chantuns portan communablamain ils custs. La part dals custs dals singuls chantuns sa drizza tenor la grevezza che las vias naziunalas muntan per els, tenor lur interess per talas vias e tenor lur capacitad finanziala.

4.¹⁶⁴ Disposiziun transitorica tar l’art. 112b (Promoziun da l’integraziun d’invalids)

A partir da l’entrada en vigur dal conclus federal dals 3 d’october 2003¹⁶⁵ davart la refurma da la gulivaziun da finanzas e da la repartiziun da las incumbensas tranter la Confederaziun ed ils chantuns surpiglian ils chantuns las prestaziuns da fin uss da l’assicuranza d’invalids vi da stabiliments, chasas da dimora e lavuratoris, fin ch’els disponan da concepts approvads dal chantun en favur dals invalids, che reglan la concessiun da contribuziuns vi da la construcziun e vi da la gestiun d’instituziuns che dattan accoglientscha a persunas extrachantunalas, almain dentant durant trais onns.

5.¹⁶⁶ Disposiziuns transitoricas tar l’art. 112c (Agid als attempads ed als impedids)

Las prestaziuns da fin uss tenor l’artitgel 101^bis da la Lescha federala dals 20 da de­cember 1946¹⁶⁷ davart l’assicuranza per vegls e survivents per l’agid e per la tgira dals attempads e dals impedids a chasa vegnan pajadas vinavant dals chantuns fin a l’entrada en vigur d’ina regulaziun chantunala da finanziaziun per l’agid e per la tgira a chasa.

7.¹⁶⁸ Disposiziun transitorica tar l’art. 120 (Tecnologia da gens en il sectur betg uman)

L’agricultura svizra n’utilisescha nagins organissems modifitgads geneticamain du­rant tschintg onns suenter che questa disposiziun constituziunala è vegnida accep­tada. En spezial na dastgan ni vegnir importads ni vegnir mess en circulaziun:

a.

plantas, parts da plantas e semenza modifitgadas geneticamain ch’èn ablas da sa multiplitgar e ch’èn destinadas per vegnir utilisadas or en il liber tar l’agricultura, tar l’orticultura u tar la selvicultura;

b.

animals modifitgads geneticamain ch’èn destinads per la producziun da victualias e d’auters products agriculs.

8.¹⁶⁹ Disposiziun transitorica tar l’art. 121 (Dimora e domicil da persunas estras)

Il legislatur sto definir ed agiuntar ils causals tenor artitgel 121 alinea 3 e decretar las pre­scripziuns penalas davart l’entrada illegala tenor artitgel 121 alinea 6 entaifer maxi­malmain 5 onns dapi l’acceptanza da l’artitgel 121 alineas 3–6 tras il pievel ed ils chan­tuns.

9.¹⁷⁰ Disposiziun transitorica tar l’art. 75b (Abitaziuns secundaras)

¹ Sche la legislaziun correspundenta n’entra betg en vigur entaifer dus onns suenter che l’artitgel 75b è vegnì acceptà, decretescha il Cussegl federal in’ordinaziun cun las disposiziuns executivas necessarias davart la construcziun, davart la vendita e davart l’inscripziun en il register funsil.

² Permissiuns da construcziun per abitaziuns secundaras, che vegnan concedidas tranter il 1. da schaner da l’onn che suonda l’acceptaziun da l’artitgel 75b e la data che las disposiziuns executivas entran en vigur, èn nunvalaivlas.

10.¹⁷¹ Disposiziun transitorica tar l’art. 95 al. 3

Fin che las disposiziuns legalas entran en vigur, decretescha il Cussegl federal las disposiziuns executivas necessarias entaifer in onn suenter che l’alinea 3 da l’artitgel 95 è vegnì acceptà dal pievel e dals chantuns.

11.¹⁷² Disposiziun transitorica tar l’art. 121a (Regulaziun da l’immigraziun)

¹ Contracts internaziunals che s’opponan a l’artitgel 121a ston vegnir tractads da nov ed adattads entaifer 3 onns suenter ch’el è vegnì acceptà tras il pievel ed ils chantuns.

² Sche la legislaziun executiva n’è betg anc entrada en vigur 3 onns suenter che l’artitgel 121a è vegnì acceptà tras il pievel ed ils chantuns, decretescha il Cussegl federal per quest termin a maun d’ina ordinaziun las disposiziuns executivas tran­sitoricas.

12.¹⁷³ Disposiziun transitorica tar l’art 10a (Scumond da cuvrir l’atgna fatscha)

La legislaziun executiva tar l’artitgel 10a sto vegnir elavurada entaifer 2 onns suen­ter che quel è vegnì acceptà dal pievel e dals chantuns.

13.¹⁷⁴ Disposiziun transitorica tar l’art. 117b (Tgira)

¹ En il rom da sias cumpetenzas decretescha la Confederaziun disposiziuns execu­tivas concernent:

a.

la fixaziun da las prestaziuns da tgira che vegnan furnidas da tgirunzas e tgirunzs sin donn e cust da las assicuranzas socialas:

1.

en atgna responsabladad,

2.

sin ordinaziun d’ina media u d’in medi;

b.

l’indemnisaziun adequata da las prestaziuns da tgira;

c.

las cundiziuns da lavur adattadas a las pretensiuns per las persunas che lavu­ran en la tgira;

d.

las pussaivladads dal svilup professiunal da las persunas che lavuran en la tgira.

² L’Assamblea federala deliberescha las disposiziuns executivas legalas entaifer 4 onns suenter l’acceptaziun da l’artitgel 117b tras il pievel ed ils chantuns. Fin che las disposiziuns executivas legalas entran en vigur prenda il Cussegl federal – entaifer 18 mais suenter l’acceptaziun da l’artitgel 117b tras il pievel ed ils chantuns – mesi­ras efficazias per eliminar la mancanza da tgirunzas e tgirunzs diplomads.

14.¹⁷⁵ Disposiziun transitorica tar l’art. 118 al. 2 lit. b (Protecziun da la sanadad)

L’Assamblea federala deliberescha las disposiziuns executivas legalas entaifer 3 onns suenter l’acceptaziun da l’artitgel 118 alinea 2 litera b tras il pievel ed ils chantuns.

Data da l’entrada en vigur: 1. da schaner 2000¹⁷⁶

¹⁵⁶ Acceptà en la votaziun dal pievel dals 3 da mars 2002, en vigur dapi ils 3 da mars 2002 (COF dals 5 d’oct. 2001, COCF dals 26 d’avr. 2002 – AS 2002 885; BBl 2000 2453, 2001 1183 5731, 2002 3690).

¹⁵⁷ SR 0.120

¹⁵⁸ Acceptà en la votaziun dal pievel dals 28 da nov. 2004, en vigur dapi il 1. da schan. 2008 (COF dals 3 d’oct. 2003, COCF dals 26 da schan. 2005, COCF dals 7 da nov. 2007 – AS 2007 5765; BBl 2002 2291, 2003 6591, 2005 951).

¹⁵⁹ AS 2007 5765

¹⁶⁰ SR 831.20

¹⁶¹ L’art. 83 ha ussa ina nova versiun. Acceptà en la votaziun dal pievel dals 28 da nov. 2004, en vigur dapi il 1. da schan. 2008 (COF dals 3 d’oct. 2003, COCF dals 26 da schan. 2005, COCF dals 7 da nov. 2007 – AS 2007 5765; BBl 2002 2291, 2003 6591, 2005 951).

¹⁶² SR 725.113.11

¹⁶³ AS 2007 5765

¹⁶⁴ Acceptà en la votaziun dal pievel dals 28 da nov. 2004, en vigur dapi il 1. da schan. 2008 (COF dals 3 d’oct. 2003, COCF dals 26 da schan. 2005, COCF dals 7 da nov. 2007 – AS 2007 5765; BBl 2002 2291, 2003 6591, 2005 951).

¹⁶⁵ AS 2007 5765

¹⁶⁶ Acceptà en la votaziun dal pievel dals 28 da nov. 2004, en vigur dapi il 1. da schan. 2008 (COF dals 3 d’oct. 2003, COCF dals 26 da schan. 2005, COCF dals 7 da nov. 2007 – AS 2007 5765; BBl 2002 2291, 2003 6591, 2005 951).

¹⁶⁷ SR 831.10

¹⁶⁸ Acceptà en la votaziun dal pievel dals 27 da nov. 2005, en vigur dapi ils 27 da nov. 2005 (COF dals 17 da zer. 2005, COCF dals 19 da schan. 2006 – AS 2006 89; BBl 2003 6903, 2004 4937, 2005 4039, 2006 1061).

¹⁶⁹ Acceptà en la votaziun dal pievel dals 28 da nov. 2010, en vigur dapi ils 28 da nov. 2010 (COF dals 18 da zer. 2010, COCF dals 17 da mars 2011 – AS 2011 1199; BBl 2008 1927, 2009 5097, 2010 4241, 2011 2771).

¹⁷⁰ Acceptà en la votaziun dal pievel dals 11 da mars 2012, en vigur dapi ils 11 da mars 2012 (COF dals 17 da zer. 2011, COCF dals 20 da zer. 2012 – AS 2012 3627; BBl 2008 1113 8757, 2011 4825, 2012 6623).

¹⁷¹ Acceptà en la votaziun dal pievel dals 3 da mars 2013, en vigur dapi ils 3 da mars 2013 (COF dals 15 da nov. 2012 e dals 30 d’avr. 2013 – AS 2013 1303; BBl 2006 8755, 2008 2577, 2009 299, 2012 9219, 2013 3129).

¹⁷² Acceptà en la votaziun dal pievel dals 9 da favr. 2014, en vigur dapi ils 9 da favr. 2014 (COF dals 27 da sett. 2013, COCF dals 13 matg 2014 – AS 2014 1391; BBl 2011 6269, 2012 3869, 2013 291 7351, 2014 4117).

¹⁷³ Acceptà en la votaziun dal pievel dals 7 da mars 2021, en vigur dapi ils 7 da mars 2021 (COF dals 19 da zer. 2020, COCF dals 31 da matg 2021 – AS 2021 310; BBl 2017 6447; 2019 2913; 2020 5507; 2021 1185).

¹⁷⁴ Acceptà en la votaziun dal pievel dals 28 da nov. 2021, en vigur dapi ils 28 da nov. 2021 (COF dals 18 da zer. 2021, COCF dals 11 d’avr. 2022 – AS 2022 240; BBl 2017 7724, 2018 7653, 2021 1488, 2022 894).

¹⁷⁵ Acceptà en la votaziun dal pievel dals 13 da favr. 2022, en vigur dapi ils 13 da favr. 2022 (COF dal 1. d’oct. 2021, COCF dals 11 d’avr. 2022 – AS 2022 241; BBl 2019 6883, 2020 7049, 2021 2315, 2022 895).

¹⁷⁶ COF dals 28 da sett. 1999 (AS 1999 2555; BBl 1999 7922).