Cudesch da procedura penala (CPP)

Art. 184

¹ La direcziun da la procedura nominescha l’expert.

² Ella al conceda ina incumbensa en scrit; quella cuntegna:

a.

la designaziun da l’expert;

b.

eventualmain la remartga che l’expert possia engaschar ulteriuras persunas sut sia responsabladad per elavurar l’expertisa;

c.

las dumondas formuladas en moda precisa;

d.

il termin per consegnar l’expertisa;

e.

il renviament a l’obligaziun da l’expert e da sias eventualas persunas auxiliaras da mantegnair secret il cuntegn da l’incumbensa;

f.

il renviament a las consequenzas penalas d’ina expertisa faussa tenor l’artitgel 307 CP¹.

³ La direcziun da la procedura dat ordavant la pussaivladad a las partidas da s’exprimer davart l’expert e davart las dumondas e da far atgnas propostas en chaussa. En cas d’analisas da labor po ella desister da quai, en spezial, sch’i sa tracta d’eruir la concentraziun d’alcohol en il sang u il grad da purezza da substanzas, da cumprovar narcotics en il sang u da far in profil dal DNA.

⁴ Ensemen cun l’incumbensa surdat ella a l’expert las actas ed ils objects ch’èn necessaris per far l’expertisa.

⁵ Ella po revocar da tut temp ina incumbensa e nominar novs experts, sche quai è en l’interess da la chaussa penala.

⁶ Avant che conceder l’incumbensa po ella pretender in preventiv dals custs.

⁷ Sche l’accusader privat pretenda in’expertisa, po la direcziun da la procedura colliar la concessiun da l’incumbensa cun la cundiziun che l’accusader privat prestia in pajament anticipà dals custs.

¹ SR 311.0