Lescha federala davart las persunas estras e l’integraziun (LEI)

Art. 105 Communicaziun da datas da persunas a l’exteriur

¹ Per ademplir lur incumbensas, cunzunt per cumbatter acts chastiabels tenor questa lescha, pon il SEM e las autoritads chantunalas cumpetentas communitgar datas da persunas estras a las autoritads estras che han incumbensas correspundentas, sche questas autoritads garanteschan ina protecziun da datas ch’è equivalenta a la protecziun da datas svizra.

² Las suandantas datas da persunas pon vegnir communitgadas:

a.

las persunalias da la persuna estra (num, prenum, pseudonims, data da naschientscha, lieu da naschientscha, schlattaina, naziunalitad, ultima adressa en il stadi d’origin u da derivanza) e - sche quai è necessari - dals confamigliars;

b.

indicaziuns davart il passaport u davart auters documents d’identitad;

c.

datas biometricas;

d.

ulteriuras datas ch’èn necessarias per identifitgar ina persuna;

e.

indicaziuns davart il stadi da sanadad, sche quai è en l’interess da la persuna pertutgada e sche quella è vegnida infurmada;

f.

las datas ch’èn necessarias per garantir l’entrada en il stadi da destinaziun sco er la segirezza da las persunas accumpagnantas;

g.

indicaziuns davart ils lieus da dimora e davart ils itineraris;

h.

indicaziuns davart la regulaziun da la dimora e davart visums concedids.